Հայաստան. մի քաղաքակրթության պատմություն

Իտալիայում ՀՀ դեսպան Ռուբեն Կարապետյանն աշխատանքային այցով հոկտեմբերի 3-4-ը գտնվում էր Վենետիկում Հայ գրատպության 500-ամյակին նվիրված` «Հայաստան. մի քաղաքակրթության պատմություն» խորագրով կայանալիք ցուցահանդեսի հետ կապված մի շարք հարցեր քննարկելու նպատակով. տեղեկացնում են ՀՀ ԱԳՆ-ից:

Այցելության շրջանակներում դեսպանը հանդիպել է Վենետիկի քաղաքապետ Ջիորջիո Օրսոնիի հետ եւ քննարկել դեկտեմբերին կայանալիք ցուցահանդեսի կազմակերպումը, ինչպես նաև Երեւանի եւ Վենետիկի միջեւ համագործակցության հնարավորությունը: Պայմանավորվածություն է ձեռք բերվել ցուցահանդեսի բացմանը զուգահեռ Վենետիկի կենտրոնական Սան Մարկո տաճարում կազմակերպել հայկական հոգեւոր երաժշտության երեկո:

Դեսպանը հանդիպել է Վենետիկի քաղաքային եւ Վենետոյի նահանգային իշխանությունների ներկայացուցիչների հետ, ինչպես նաեւ այցելել Սուրբ Ղազար կղզի եւ Մխիթարյան միաբանության աբբահոր` Հայր Եղիա Քիլաղբյանի հետ քննարկել դեկտեմբերին կայանալիք ցուցահանդեսին Միաբանության մասնակցության հետ կապված մի շարք հարցեր: