Քրիստոնյաները փախչում են Եգիպտոսից

Եգիպտոսի ղպտիների ոչ կառավարական կազմակերպությունները տեղեկացնում են, որ քրիստոնյաները զանգվածաբար լքում են երկիրը:

Մարդու իրավունքների եգիպտական ֆեդերացիայի զեկույցի համաձայն` Հոսնի Մուբարաքի վարչակազմի տապալումից հետո Եգիպտոսից հեռացել է ավելի քան 100 հազար ղպտի: Սպասվում է, որ մինչեւ տարեվերջ երկիրը կլքի եւս 250 հազար քրիստոնյա. տեղեկացնում է mignews.com-ը:

Ղպտիների մեծ մասը մեկնում է ԱՄՆ. ներկայումս այնտեղ է հաստատվել 42 հազար մարդ: Նրանք ապաստան են գտնում նաեւ Ավստրալիայում, Կանադայում եւ Արեւմտյան Եվրոպայում:

Ըստ զեկույցի` ղպտիների` Եգիպտոսից հեռանալու պատճառը սալաֆիստական խմբավորումների սպառնալիքներն են: Վերջիններս ցանկանում են երկրում հաստատել շարիաթի կանոնները, իսկ «հեղափոխական» իշխանություններն էլ ի վիճակի չեն պաշտպանել ղպտիական եկեղեցիները նրանց հարձակումներից: