Հայաստանը հաստատակամ է բարեփոխումները շարունակել ԵՄ-ի աջակցությամբ

ՀՀ նախագահ Սերժ Սարգսյանն այսօր ընդունել է Եվրոպական խորհրդարանի փոխնախագահ Լիբոր Ռուչեկի գլխավորած պատվիրակությանը:

Նախագահը ողջունել է ՀՀ անկախության 20-ամյակի տոնակատարությունների առիթով ԵԽ պատվիրակության այցը Հայաստան: «Այս քսան տարիների ընթացքում Հայաստանի պետականության ամրապնդմանը զուգահեռ զարգացել են նաև մեր հարաբերությունները եվրոպական կառույցների հետ: Վերջին տարիներին Հայաստանի եվրաինտեգրման գործընթացը կրել է շատ ավելի հաստատուն բնույթ»,- ասել է Սերժ Սարգսյանը:

Նախագահի խոսքով` Հայաստանը որդեգրել է եվրոպական ընտանիքի արժեհամակարգի վրա հիմնված պետականաշինության ուղին, և այդ առումով սերտ համագործակցությունը Եվրախորհրդարանի հետ մեծ նշանակություն ունի Հայաստանի եվրաինտեգրման ճանապարհին: Հանրապետության ղեկավարն ընդգծել է, որ Հայաստանի համար Եվրամիությունը ոչ միայն կարևոր գործընկեր է արտաքին քաղաքականության և առևտրատնտեսական բնագավառներում, այլ նաև ներքին բարեփոխումների իրականացմանն ուղղված համագործակցության շրջանակներում:

Հանրապետության ղեկավարի խոսքով` Հայաստանը հաստատակամ է բարեփոխումների ճանապարհը շարունակել ԵՄ-ի աջակցությամբ, փորձի կիրառմամբ և խորհուրդներով:

Հանդիպման ընթացքում երկուստեք կարևորվել է Արևելյան գործընկերության շրջանակներում համագործակցությունը՝ ուղղված տարածաշրջանի զարգացմանը, համագործակցության խթանմանն ու բարեկեցությանը:

Լիբոր Ռուչեկը շնորհավորել է նախագահին ՀՀ անկախության 20-ամյակի առթիվ և նշել, որ անցած քսան տարիների ընթացքում Հայաստանի առաջընթացը նկատելի է: Նա հավելել է, որ այդ գործընթացը տևական է, և կարճ ժամանակահատվածում հնարավոր չէ լուծել բոլոր խնդիրները, ունենալ զարգացած ժողովրդավարություն և բարեկեցություն: Նա կարևորել է իրականացվող բարեփոխումներն ու վստահեցրել, որ եվրաինտեգրման ճանապարահին Հայաստանն այսուհետ էլ կստանա անհրաժեշտ աջակցություն: