2019-ին հայկական զորախումբը շարունակելու է իր ծառայությունը «Հաստատակամ աջակցություն» առաքելության կազմում

ՀՀ արտաքին գործերի նախարարության մամուլի խոսնակ Աննա Նաղդալյանը լրագրողների հետ հանդիպման ժամանակ ամփոփել է մեկ ամսվա և, ընդհանրապես, այս տարվա ընթացքում տեղի ունեցած արտաքին քաղաքական իրադարձություններն ու արտաքին գերատեսչության ղեկավարի այցերը: Նա հայտնեց, որ ՀՀ ԱԳ նախարարի պաշտոնակատար Զոհրաբ Մնացականյանն այս տարվա մայիսից պաշտոնը ստանձնելուց հետո  ունեցել է 23 պաշտոնական և աշխատանքային այց, նաև  ՀՀ-ում  անցկացրել է մոտ 150 առանձին հանդիպում, 53-ը՝ արտաքին գործերի նախարարների հետ:

ՀՀ ԱԳՆ մամուլի խոսնակը  շեշտեց, որ Հայաստանը մեծապես կարևորում է բազմակողմ հարթակները՝ մեջբերելով Զոհրաբ Մնացականյանի խոսքը, թե «աճող պոպուլիզմի և ծայրահեղականության ներկա մարտահրավերներն ընդգծում են առավել բազմակողմ հարթակ ունենալու հրամայականը»:

Աննա Նաղդալյանը, մասնավորապես, տեղեկացրեց, որ  «Հաստատակամ աջակցություն» առաքելության նախարարական հանդիպման ընթացքում  ԱԳ նախարարի պաշտոնակատարը վերահաստատել է՝  2019-ին  հայկական զորախումբը`  մինչև 130 զինծառայողով, շարունակելու է  ծառայությունը «Հաստատակամ աջակցություն» առաքելության  կազմում:

Անդրադառնալով  ԵԱՀԿ ՄԽ խմբի աջակցությամբ  Միլանում տեղի ունեցած` Հայաստանի և Ադրբեջանի արտաքին գործերի նախարարների հանդիպմանը, ԱԳՆ մամուլի խոսնակը հիշեցրեց, որ դրա արդյունքում ընդունվել է հնգակողմ հայտարարություն, իսկ դրան հաջորդած նախարարական համաժողովում ելույթ ունենալիս Զոհրաբ Մնացականյանը նշել է՝ «խաղաղությանը նպաստող միջավայրը  էական նշանակություն ունի բանակցային գործընթացի համար», և որ այս առումով «նշանակալի ներդրում կլինի Դուշանբեում ձեռք բերված համաձայնության  և ավելի վաղ տեղի ունեցած  պայմանավորվածությունների իրագործումը»: