Քաղցրեղենի շատ օգտագործումը նպաստում է ծերացմանը

Շաքարը ոչ միայն լայնացնում է մեջքը, առաջացնում կարիես, այլև արագացնում է ծերացման գործընթացը: Ինչպես տեղեկացնում է Doctors.am-ը, դա ապացուցել են մաշկաբաններն ու սննդաբանները:

Սննդաբան Միշել Շեւալյե-Հեջն ասում է, որ քաղցրեղենի նկատմամբ սերը հանգեցնում է նրան, որ մարդու օրգանիզմում հայտնվում են վնասակար մոլեկուլներ, որոնք կոչվում են գլիկացման վերջնական արդյունքներ (AGE): Դրանք վնասում են կոլագենն ու էլաստինը:

Իսկ այն հակաօքսիդանտները, որոնք օգնում են մաշկին պահպանել առողջ և թարմ տեսքը, շաքարի օգտագործման դեպքում, ընդհակառակը, պակասում են: Բժշկի խոսքերով` բազմաթիվ մարդիկ նույնիսկ չեն կասկածում, որ շաքար են օգտագործում հացի, սպորտային ըմպելիքների ու յոգուրտների հետ միասին: Հետևաբար, կրճատելով շաքարի օգտագործումը և վերանայելով սննդակարգը, կարելի է զգալիորեն փոխել մաշկի վիճակը:

Իսկ բժիշկ Ֆիլիպ Արտեմին ասում է. «Եթե համեմատության մեջ դնենք մաշկը վնասող գործոնները, ապա արևը գտնվում է առաջին տեղում: Հետո գալիս է գենետիկան: Շաքարի օգտագործումը կրճատելու դեպքում դա, բնականաբար, կազդի ձեր օրգանիզմի վրա, սակայն պետք չէ սպասել, որ կնճիռները միանգամից կանհետանան»: