Մեղրամիսը հիանալի է անցել

Հայազգի գեղեցկուհի Քիմ Քարդաշյանը բաց չի թողել սեփական մեղրամիսի մանրամասներն ու լուսանկարները ներկայացնելու առիթը:

Ինչպես գրում է Daily Mail-ը, 30-ամյա Քիմն ու նրա ամուսինը`26-ամյա Քրիս Համֆրիսը, մեղրի պես քաղցր օրեր են անցկացրել Իտալիայի Ամալֆի ծովափին` հանգրվանելով Santa Caterina հյուրանոցի «Ռոմեո եւ Ջուլիետ» շալեում եւ յուրաքանչյուր գիշերվա համար վճարելով 3.300 դոլար:

Թեեւ ամուսնությունից հետո Քիմը հայտարարել էր, որ աշխատանքային լարված գրաֆիկի պատճառով մեղրամիսի կմեկնեն միայն հաջորդ տարի, սակայն խոստովանել է, որ «վերջին րոպեին Քրիսն իրեն անակնկալ է մատուցել, եւ իրենք կատարյալ մեղրամիս են անցկացրել»:

Մեղրամսի ընթացքում Քիմը նաեւ բիկինիների ցուցադրություն է կազմակերպել. երեք օրվա ընթացքում լուսանկարիչները նրան ֆիքսել են վեց տարբեր լողազգեստներով: Ի դեպ, գեղեցկուհին ցուցադրել է նաեւ հատուկ իր համար կարված` «Միսսիս Համֆրիս» գրությամբ բիկինին:

«People» ամսագրին տված հարցազրույցում միսսիս Համֆրիսը խոստովանել է, որ իրեն լավ է զգում ամուսնացած կնոջ կարգավիճակում եւ մայրանալու հույս ունի: «Մայր լինելն այն է, ինչ միշտ ցանկացել եմ»,- անկեղծացել է աստղը: