ԺՈՂՈՎՈՒՐԴ. Բա մենք քարից ե՞նք

Երեկ սենսացիոն դեպք է տեղի ունեցել Սերժ Սարգսյանի և Լեհաստանի նախագահ Բրոնիսլավ Կոմորովսկու հանդիպման ժամանակ: Թարգմանչուհին հենց հանդիպման ընթացքում ուշագնաց է եղել:

«Ժողովուրդ»-ի աղբյուրների տեղեկացմամբ` Սերժ Սարգսյանի խոսքերը թարգմանելիս նա մի պահ լռել է: Սարգսյանը նրան բացատրել է, թե խոսքն ինչի մասին է, սակայն թարգմանչուհին միանգամից ուշագնաց է եղել: Անակնկալի եկած Սարգսյանը հասցրել է միայն ասել` «վա՛յ»:

Մեր աղբյուրների պնդմամբ` ուշագնացության պատճառը եղել է 40 աստիճան շոգը: Կարճ ժամանակ անց թարգմանչուհին ուշքի է եկել, այնուհետև դուրս է եկել հանդիպման սրահից, իսկ նրան փոխարինել է մեկ ուրիշը:

Մեզ հաջողվեց ճշտել, որ թարգմանչուհին Լեհաստանի հայ է, անունն էլ` Մարգարիտա:

Նշենք, որ հուլիսի 30-ին,  31-ին և օգոստոսի մեկին Արարատյան դաշտավայրում և Սյունիքի հովիտներում կգրանցվի առավելագույն` 40 աստիճան տաքություն: Գիշերային ժամերին Երևանում ջերմաստիճանը կտատանվի 27-28-ի սահմաններում, ինչը նույնպես բարձր է: Ջերմաստիճանը կնվազի միայն օգոստոսի 5-ից հետո` 4-5 աստիճանով: