ՀԱՅԿԱԿԱՆ ԺԱՄԱՆԱԿ. Ափսոս, տրամվայ չկար

Աշխարհի չեմպիոնի կոչումը նվաճած Հայաստանի շախմատի հավաքականի պատվին նախօրեին Ազատության հրապարակում տոնական համերգ էր կազմակերպվել, որն ավարտվեց շքեղ հրավառությամբ:

Համերգի ավարտից հետո աշխարհի չեմպիոններին Ազատության հրապարակում գտնվող «Ջազվե» սրճարանում հյուրընկալեցին Սերժ ու Տիգրան Սարգսյանները, որոնք զբաղեցնում են նաեւ ՀՀ շախմատի ֆեդերացիայի նախագահի եւ նախագահի տեղակալի պաշտոնները: Շուրջ մեկ ժամ անց Սերժ եւ Տիգրան Սարգսյանները իրենց մեծ ավտոշարասյուներով հեռացան, իսկ շախմատիստները` դափնեպսակները ձեռքներին, մնացին Ազատության հրապարակի մուտքի մոտ:

Շախմատի աշխարհի չեմպիոնները հեռացան տաքսիներով: Նույն բանն էր արձանագրվել 2008-ին. նոյեմբերի 27-ին մարզահամերգային համալիրում օլիմպիական չեմպիոնի տիտղոսը նվաճած շախմատի մեր հավաքականի պատվին կազմակերպված ճոխ արարողությունից հետո օլիմպիական չեմպիոն շախմատիստները համալիրից տուն գնացին` տաքսի «գալասավատ» անելով:

Նկարում Ռոբերտ Հովհաննիսյանն է` հարազատների հետ տաքսի նստելիս, նրանք դափնեպսակն են տեղավորում մեքենմայի դիմացի նստատեղին: