Արցախյան հարցը վաղը չի լուծվելու

Ե’վ Վաշինգտոնում, ե’ւ Մոսկվայում շատ լավ հասկանում են, որ Արցախյան հարցի արագ լուծման դեղատոմս իսկապես գոյություն չունի. լրագրողների հետ հանդիպման ժամանակ հայտարարեց Կովկասի ինստիտուտի փոխտնօրեն, քաղաքագետ Սերգեյ Մինասյանը։

Նրա համոզմամբ` ՌԴ արտգործնախարար Սերգեյ Լավրովի այցը տարածաշրջան եւ նախագահների ունեցած հեռախոսազրույցները ապացուցում են, որ թե' Մինսկի խմբի համանախագահ երկրները, թե' Եվրամիությունը նոր պատերազմ չեն ցանկանում: Եվ եթե անգամ մոտ ժամանակներս որեւէ փաստաթուղթ ստորագրվի, կնշանակի, որ  գերտերություններն այդ ձեւով փորձում են խուսափել նոր լարվածությունից հակամարտային գոտում:

«Այդ փաստաթղթերի ստորագրումից հետո կսկսվի նոր փուլ, որը կարող է տեւել տարիներ, նույնիսկ տասնամյակներ: Հասկանալի է, որ ընդհանուր սկզբունքները դա ընդհանուր ներածություն է կոնկրետ խոսակցության համար, այլ ոչ թե մի իրավիճակ, երբ Ղարաբաղյան կոնֆլիկտը հենց այդ փաստաթուղթը ստորագրելուց հետո վաղը լուծվելու է: Դա ֆիզիկապես անհնար է»,- համոզված է քաղաքագետը:

Անդրադառնալով Լավրովի այցին եւ նրա բերած ուղերձ-առաջարկություններին` Սերգեյ Մինասյանը նշեց, որ նույնիսկ Ադրբեջանում որեւէ մեկը չի կասկածում, թե որ կողմն էր մեղավոր Կազանի հանդիպման ձախողման մեջ: Քաղաքագետի խոսքերով` պարզապես ՌԴ նախագահի համար դա անձնական գործ է դարձել, եւ նման ձախողումները բավականին բացասական են անդրադառնում նրա իմիջի վրա: