Խոսել են պետհամալսարանի խախտումներից

ԼՂՀ Ազգային ժողովի` օրերս կայացած նիստում դարձյալ խոսել են Արցախի պետական համալսարանում տեղի ունեցած խախտումների մասին: Պատգամավոր Արեւիկ Պետրոսյանն անդրադարձել է 2010-ին ԱրՊՀ-ում դեկանի ընտրություններին, որոնց ընթացքում, ըստ նրա, օրենքի լուրջ խախտումներ են գրանցվել, մասնավորապես` անձի վրա ճնշում գործադրելու դեպքեր։ Արդյունքում այդ դասախոսը հետ է վերցրել իր թեկնածությունը։ Ասել է թե՝ խախտվել է նրա ընտրելու եւ ընտրվելու  սահմանադրական  իրավունքը:

Ի պատասխան կրթության եւ գիտության նախարար Վլադիկ Խաչատրյանը, անդրադառնալով ճնշում գործադրելու դեպքերին, շեշտել է, որ, ըստ իր տեղեկությունների, դասախոսն իր կամքով է դիմումը հետ վերցրել:  Սակայն խոստացել է ուսումնասիրել հարցը եւ պարզաբանումներ տալ:

Հետաքրքիրն այն է, որ պետհամալսարանում տեղի ունեցող խախտումների մասին վաղուց է խոսվում, խոսակցություններն արդեն հասել են Ազգային ժողով, սակայն դեռեւս համապատասխան քայլերը չեն արվոում, թեեւ երկրի բարձրագույն ղեկավարության եւ համալսարանի պրոֆեսորադասախոսական կազմի ու ուսանողների հանդիպումների ժամանակ խոսվում է համալսարանում կաշառակերության եւ այլ բացասական երեւույթների դեմ պայքարի անհրաժեշտության մասին։

Հիշեցնենք, որ մի քանի ամիս առաջ լրատվամիջոցներում եւ սոցիալական ցանցերում լուրջ քննարկվում էր նաեւ պետհամալսարանի հանրակացարանի կենցաղային վատ պայմանների հարցը։