Երիտասարդներն ընդդեմ ծխախոտի

Պետական համալսարանի բակում Գեղարվեստի ազգային կենտրոնի քոլեջ-ստուդիայի սաները կազմակերպել էին ցուցահանդես` նվիրված ծխախոտի դեմ պայքարին: Ցուցահանդեսը կազմակերպմանը աջակցել էին Հայաստանի Ամերիկյան համալսարանը և Առողջապահական ծառայությունների հետազոտման և զարգացման կենտրոնը:

Ըստ կենտրոնի գիտաշխատող Արուս Հարությունյանի՝ ընտրվեց հենց պետական համալսարանը, քանի որ այնտեղ է երիտասարդության կորիզը:

«Լավ կլիներ, որ երիտասարդներն էլ ներգրավվեն այս պայքարում և ունենանք Հայաստան, որը կլինի առանց ծխախոտի»,- ասաց նա:

Երիտասարդ նկարիչների խմբի ղեկավար Սամվել Բաղդասարյանը նշեց, որ ցուցահանդեսը լինելու է շարժական. այն ցուցադրվելու է նաև այլ բուհերում:

Ցուցահանդեսի մասնակից 14-ամյա Սոնայի խոսքերով՝ ինքը մասնակցում է ցուցադրությանը, որպեսզի իր աշխատանքի միջոցով մարդկանց ասի` ծխելու հետեւանքները ցավբալի կարող են լինել. «Թող մարդիկ նայեն ու փոշմանեն, որ ծխում են»:

Ցուցադրության ընթացքում անցկացվեց նաև քվեարկություն. ընտրվեցին երեք՝ ավելի շատ ձայներ հավաքած նկարները, սակայն բոլոր մասնակիցներին նվիրեցին բաժակներ` վրան ծխախոտն արգելող նշանով:

Անուշ Ամիրբեկյան