6,7 միլիարդից 1 միլիարդը հաշմանդամ են

Սահմանափակ հնարավորությունների տեր մարդկանց վերաբերյալ առաջին պաշտոնական` Գլոբալ զեկույցի տվյալներով` հաշմանդամություն ունեցողների թիվն աշխարհում աճում է. այսօր նրանք մոտ 1 միլիարդ են:

Առողջապահության համաշխարհային կազմակերպության եւ Համաշխարհային բանկի զեկույցում նշվում է, որ Երկրի բնակչության 15%-ը հաշմանդամ է, եւ չնայած մարդկանց իրավունքների համար մղվող պայքարին` նրանց հասարակությունն ընդունում է որպես երկրորդ կարգի քաղաքացիներ:

Փաստաթղթում նշվում է, որ զարգացած երկրներում հաշմանդամներին երեք անգամ քիչ են բժշկական ծառայություն մատուցում, քան այլ մարդկանց: Սահմանափակ հնարավորություններով երեխաներն ավելի հազվադեպ են դպրոց գնում ու ավելի քիչ են սովորում, քանի առողջները, իսկ հաշմանդամների զբաղվածության մակարդակը 44 տոկոս է:

Նման մարդկանց համար լիարժեք կյանքով ապրելու խոչընդոտներն են` նախապաշարմունքները, խտրականությունը, անհրաժեշտ բժշկական եւ վերականգնողական ծառայությունների բացակայությունը, անհասանելի տրանսպորտը, անհարմար շենքերը, ինչպես նաեւ տեղեկատվության բացակայությունը:

Զեկույցից երեւում է, որ աշխարհում չկա այդ առումով բարենպաստ որեւէ երկիր, իսկ զարգացող երկրներում պատկերն ավելի վատ է: