ԺՈՂՈՎՈՒՐԴ. Մարզպետը կաշխատի նաեւ Հրանտ Բագրատյանի հետ

- Պարո՛ն Ղահրամանյան, Ձեզ ցավ չի՞ պատճառում, որ անկախ Հայաստանը մեր աչքերի առջեւ օր օրի հայաթափվում է` ե՛ւ գյուղերը, ե՛ւ քաղաքները:

- Իհարկե, ցավալի է, բայց մի բան իմացեք` թե' գործազրկության, թե' արտագաղթի առումով մեր մարզը վերջին տեղում է:

- Դուք գո՞հ եք Տիգրան Սարգսյանի վարած տնտեսական քաղաքականությունից:

- Հանրապետականն այսօր պատասխան է տալիս ներկա տնտեսական վիճակի համար: Թերություն ունենում է աշխատող մարդը: Չաշխատող մարդը թերություն չի ունենում: Մեր կառավարությունը ծրագրում է, սակայն փոքր երկիր ենք, մեկ էլ տեսար մի տեղում գերտերությունների վարած քաղաքականության արդյունքում մի բան խանգարեց: Մեկ մի բան է քո դիմացը փակում, մեկ մյուսն է խանգարում, արանքում չգիտես` ինչ անես:  Էնպես որ, ովքեր քննադատում են, իրենք էդ պաշտոնի ծանրությունը չգիտեն: Իրենց թվում է, թե ամեն ինչ խաղ ու պար է: Անկախ նրանից` ընդդիմություն է, թե իշխանություն, եթե մեկն էսօր մեր նախագահի վարած քաղաքականությունը չի հասկանում, քաղաքական գործիչ կոչվելու իրավունք չունի:

-«Բարգավաճ Հայաստան»-ը հայտարարել է, որ շուտով ՀՀ երկրորդ նախագահը կարեւոր է դերակատարություն ունենալու: Ի՞նչ համեմատություն կանեք ՀՀ երկրորդ եւ երրորդ նախագահների մասով: Ո՞ւմ հետ է հեշտ աշխատել:

- Չէ լուրջ խնդիր, էդպիսին, երկրորդ նախագահի հետ չի եղել: Ուղղակի գործող նախագահի հետ ավելի հեշտ եւ արդյունավետ եմ աշխատում: Ուժեղ մարդն է միայն ընդառաջ գնում:

-Հաջորդ հարցն ինքներդ հուշեցիք. ինչպե՞ս եք վերաբերվում իշխանություն-ընդդիմություն երկխոսությանը:

-Բնական է, որ շատ լավ ենք զգում, թեթեւություն ենք զգում, թեեւ մարզում ընդդիմությունն ուժեղ չէր: Մի բան նկատի ունեցեք` կռվի մեջ պարտվող-հաղթող չի լինում: Երբ հետ ես նայում ու տեսնում, թե ինչքան  զոհեր եւ մարդկային խեղված ճակատագրեր կան, ուրախանում ես, որ ազգի ներուժն է միանում: Եվ մենք բոլոր արհավիրքների կարող ենք դիմակայել:

- Պարոն Ղահրամանյան, ավարտելով, պատասխանեք վերջին սադրիչ հարցին` ընդդիմությունից վերադաս կընդունե՞ք, կաշխատե՞ք, ասենք, Հրանտ Բագրատյանի կառավարության հետ:

- Իմ պաշտոնը նշանակովի է: Վերադասը պիտի իմ աշխատանքից գոհ լինի, որ թույլ տա աշխատել: Եթե հրաման տան, հո չեմ կարող ասել չէ: