Համանախագահները հատել են շփման գիծը

Այսօր, ԼՂՀ իշխանությունների հետ նախօրոք ձեռք բերված պայմանավորվածության համաձայն, ԵԱՀԿ առաքելությունը Լեռնային Ղարաբաղի եւ Ադրբեջանի զինված ուժերի շփման գծի պլանային դիտարկում է անցկացրել Ակնա-Բարդա ուղղությամբ:

Ինչպես հայտնում են ԼՂՀ ԱԳՆ մամուլի ծառայությունից, Պաշտպանության բանակի դիրքերից դիտարկումն իրականացրել են ԵԱՀԿ գործող նախագահի անձնական ներկայացուցչի (ԳՆԱՆ) դաշտային օգնականներ Անթալ Հերդիչը (Հունգարիա) և Խրիստո Խրիստովը (Բուլղարիա):

Հակառակ կողմից դիտարկումը կատարել են ԵԱՀԿ գրասենյակի համակարգող Իմրե Պալատինուսը (Հունգարիա) և ԳՆԱՆ դաշտային օգնական Մարիուս Պուոձիունասը (Լիտվա):

Դիտարկման ժամանակ աշխատանքային այցով տարածաշրջանում գտնվող ԵԱՀԿ Մինսկի խմբի համանախագահներ Ռոբերտ Բրադտկեն, Բեռնար Ֆասիեն և Իգոր Պոպովը հատել են շփման գիծը նախապես ականազերծված հատվածում:

Դիտարկումն անցել է ըստ նախատեսված ժամանակացույցի, հրադադարի ռեժիմի խախտումներ չեն արձանագրվել:

ԵԱՀԿ ՄԽ համանախագահները վաղը կհանդիպեն ԼՂՀ նախագահ Բակո Սահակյանի հետ, որից հետո նախատեսված է ճեպազրույց լրագրողների հետ: