Մահացել է Աբխազիայի նախագահը

Աբխազիայի նախագահ Սերգեյ Բաղապշը կիրակը վաղ առավոտյան մահացել է Մոսկվայի հիվանդանոցներից մեկում:

Մեկ շաբաթ առաջ վիրահատել էին նրա աջ թոքը, որից հետո տեղեկություն էր տարածվել նրա առողջական վատ վիճակի մասին: Բաղապշի առողջական վիճակը վատացել է մայիսի 23-ին եւ նրան տեղափոխել են վերակենդանացման բաժին, իսկ երկու օր առաջ նրան վիրահատել էին երկրորդ անգամ: Նրա մոտ հայտնաբերվել է քաղցկեղ, թեեւ բժիշկներն այդ մասին չեն հայտարարել:

Ավելի ուշ քաղցկեղից մահանալու փաստը հաստատել է Աբխազիայի նախագահի ներկայացուցիչը:

Ինչպես գրում է Gazeta.ru-ն, Բաղապշի մահից հետո երկիրը ժամանակավորապես գլխավորելու է Աբխազիայի փոխնախագահ Ալեքսանդր Անկվաբը:

Սերգեյ Բաղապշը 62 տարեկան էր: