Նորից կունենանք այն խորհրդարանը, որն ունենք

Ընտրական օրենսգիրքը չունի լեգիտիմության որեւէ սահման, այն իշխանությունների կողմից ընդունված եւ բացառապես նրանց առաջարկների հիման վրա ձեւավորված փաստաթուղթ է եւ չի համապատասխանում մեր բոլորի ցանկություններին, այն է` անցկացնել ազատ, արդար եւ թափանցիկ ընտրություններ. այսօր լրագրողներին ասաց ԱԺ «Ժառանգություն» խմբակցության անդամ Արմեն Մարտիրոսյանը:

Նա համոզմունք է հայտնել, որ ընտրական գործընթացում իշխանությունները շարունակելու են նույն քաղաքականությունը, ինչ եղել է մինչ այժմ: «Ընտրական օրենսգիրքն ընդունվեց` առանց հաշվի առնելու հասարակության եւ ընդդիմադիր ուժերի կարծիքը, եւ սպասվող ընտրությունների արդյունքում մենք նորից կունենանք այն խորհրդարանը, որը չի համապատասխանի ե'ւ հասարակության տրամադրություններին, ե'ւ այն խնդիրներին, որոնք անհրաժեշտ է լուծել»,- նշեց ընդդիմադիր պատգամավորը: