Փաստարկները տեղ հասան

ԱԺ ՀՅԴ խմբակցության ղեկավար Վահան Հովհաննեսյանը, մեկնաբանելով կառավարության հրաժարականի մասին` խորհրդարանին ներկայացված առաջարկը, նշեց, որ այսպիսի գրագետ, քաղաքական մեթոդով հրաժարականի առաջարկ Հայաստանում դեռեւս ներկայացված չի եղել, և դա քաղաքական նոր մշակույթի ձևավորմանն ուղղված քայլ է:

Ինչ վերաբերում է առաջարկի մերժմանը, ապա, ըստ Վ. Հովհաննեսյանի, ամենակարեւորը քննարկումն էր, որն իսկապես վրդովեցրեց խորհրդարանական մեծամասնությանը:

«Իրենք էլ չէին սպասում, որ իրենց իսկ նշանակած կառավարության փաստարկները քաղաքական մեծամասնությանը որոշ իմաստով թիրախ են դարձնում, նաեւ այդ մեծամասնության նախկին ղեկավարներին` լինեն դրանք ՀՀ նախագահները, նախորդ վարչապետը, որն այսօր նախագահ է: Կարծում եմ, որ սրանք հարցեր են, որոնց պետք է պատասխան տալ»,- ասաց Վ. Հովհաննեսյանը:

Նա առաջարկում է` կա'մ կառավարությունը ճանաչում է իր շարունակականությունը եւ պատասխան տալիս իր այսօրվա անհաջողությունների համար, կա'մ անհաջողությունները կապում է նախորդ ժամանակաշրջանի հետ եւ պատասխան է տալիս այն քաղաքական մեծամասնությանը, որն այդ կառավարությունը կյանքի է կոչել:

«Ինչպես տեսաք` ԱԺ նախագահի հայտարարությունն այն մասին, թե կոալիցիան դեմ է քվեարկելու, բերեց ընդամենը 10 դեմ ձայնի. այնպես չէ, որ կոալիցիան միահամուռ դեմ քվեարկեց, ինչը նշանակում է, որ մեր բոլոր փաստարկները տեղ հասան»,- նշեց Վ. Հովհաննեսյանը: