Բեն Լադենի որդիները պատրաստվում են դատի տալ Օբամային

Սպանելով բեն Լադենին՝ ամերիկյան իշխանությունները խախտել են միջազգային իրավունքը. ասվում է «Ալ Քաիդա»-ի հանգուցյալ առաջնորդի որդիների հատուկ հայտարարության մեջ:

Ըստ նրանց` բեն Լադենին հարկավոր էր ձերբակալել եւ օրենքով դատել, ինչպես վարվեցին Հուսեյնի եւ Միլոշեւիչի հետ: Սակայն ամերիկացիները նույնիսկ չփորձեցին կենդանի բռնել նրան՝ այդպիսով խախտելով իրավական ամենակարեւոր սկզբունքներից մեկը՝ անմեղության կանխավարկածը:

Բեն Լադենի որդիները նաեւ հայտարարում են, որ իրենց հոր սպանության պատասխանատվությունը կրում է անձամբ ԱՄՆ նախագահ Բարաք Օբաման:

«Մենք համարում ենք, որ մարդուն կամայականորեն կյանքից զրկելը քաղաքական խնդիրների լուծում չէ»,- ասվում է հայտարարության մեջ, որի տեքստը ստացել է The New York Times թերթի խմբագրությունը:

Փաստաթղթի փոքր-ինչ փոփոխված տարբերակը հրապարակվել է իսլամական կայքերից մեկում:

Ըստ ամենայնի` հարազատների անունից դիմումը գրել է բեն Լադենի չորրորդ որդին՝ Օմարը, որը ներկայումս բնակվում է Կահիրեում: Նա ժամանակին դատապարտել է հոր հանցագործությունները եւ մերժել նրա քաղաքական ու կրոնական հայացքները: Սակայն ծնողի մահից հետո որդին որոշել է արդարության հասնել՝ հայտարարելով, թե դատապարտում է բռնությունն ընդհանրապես: Օմարը կոչ է արել ՄԱԿ-ին հետաքննել Ուսամա բեն Լադենի մահվան հանգամանքները, իսկ Պակիստանի իշխանություններին՝ ազատ արձակել նրա այրիներին ու երեխաներին: