Չգիտի, թե ինչ է կատարվում իշխանության եւ ընդդիմության միջեւ

Եթե երկխոսությունը վերաբերում է քաղաքական պայքարի քաղաքակիրթ կանոնների հաստատմանը, ապա Հայաստանի երկրորդ նախագահ Ռոբերտ Քոչարյանն այն դրական է գնահատում:

«Մեդիամաքսին» տված հարցազրույցում նա նշել է, որ այն կնպաստի նաեւ արդար ընտրություններ անցկացնելուն:

«Իսկ եթե երկխոսությունն առնչվում է քաղաքական պայքարի իմիտացիայի չափանիշներին (համապատասխան պարգեւատրման դիմաց), ապա դա, թերեւս, ընտրողների թիկունքում կատարվող գործարք է: Դա, ի դեպ, ուղիղ ճանապարհ է դեպի լճացում եւ կոռուպցիայի աճ, քանի որ ընդդիմությունն անմիջապես դադարում է կատարել իր հիմնական առաքելությունը` դրդել իշխանություններին ավելի լավ աշխատել եւ զսպել ախորժակը: Այդ գործարքի գինը ժողովուրդն է վճարելու` իր` առանց այդ էլ սակավ միջոցներից»,- ասել է Ռ. Քոչարյանը` հավելելով, որ ինքը ընդամենը հնարավոր տարբերակներն ու հետեւանքներն է նկարագրում, իսկ թե կոնկրետ ինչ է կատարվում իշխանության եւ ընդդիմության միջեւ, չգիտի: