Պայքար թմրաբիզնեսի դեմ` նարկոբարոնների միջոցներով

«Մեծ ութնյակի» երկրների` թմրանյութերի մաքսանենգության դեմ պայքարին նվիրված ընդլայնված խորհրդակցության ժամանակ Ֆրանսիայի նախագահ Նիկոլա Սարկոզին առաջարկել է ստեղծել հիմնադրամ, որը կգործի ՄԱԿ-ի վերահսկողության տակ եւ կֆինանսավորվի նարկոբարոնների սառեցված բանկային հաշիվներից:

Փարիզում անցկացվող խորհրդակցությանը, որը Ֆրանսիան կազմակերպել է որպես «Մեծ ութնյակի» նախագահող երկիր, մասնակցում են 21 երկրների նախարարներ ու դեսպաններ:

«Հիմնադրամը մեկ խնդիր է ունենալու` աջակցել թմրամիջոցների անօրինական տեղափոխումից տառապող երկրներին: Եթե այն գործի այնպիսի հեղինակավոր կազմակերպության ներքո, ինչպիսին ՄԱԿ-ն է, դա կապահովի գործողությունների արդյունավետությունը եւ կառավարման որակը»,- ըստ RFI-ի` հայտարարել է Ֆրանսիայի նախագահը: