Նամակ ՀՀ "թագավորին"

Էկոլոգիական վիճակը հանրապետությունում շարունակում է սրընթաց վատանալ. ահազանգում են բնապահպանները եւ դժգոհում ՀՀ նախագահի վերջին հայտարարությունից, որ Հայաստանի զարգացումը կապված է հանքարդյունաբերության հետ:

Հրազդանի երկաթի հանքավայրերի շահագործման հետ կապված` բնապահպանները «Երկիր»-ին հայտնեցին, որ հանքարդյունաբերության նոր նախագծերին հանրությունը տեղյակ է դառնում շատ ուշ` երբ աշխատանքներն արդեն սկսված են լինում:

Հրազդանի երկաթի հանքը գտնվում է այն սարին, որի շուրջը ձեւավորվել են Հրազդան քաղաքը եւ հարակից համայնքները:

«Հանքը վաճառվել է չինացիներին, որոնք նույնիսկ տեղյակ չեն եղել, թե որտեղ է գտնվում այն: Այդ տարածքով են անցնում խմելու ջրի ամբարներ, ոռոգման ջրեր, եւ հանքի շահագործումը անուղղելի հետեւանքների կհանգեցնի»,- ահազանգում են բնապահպանները:

Այդ կապակցությամբ նրանք պատրաստել են բաց նամակ` ուղղված ինչպես ՀՀ նախագահին, այնպես էլ վարչապետին, ԱԺ նախագահին, գլխավոր դատախազին եւ այլ շահագրգիռ գերատեսչություների:

Բնապահպանները ՀՀ նախագահից ակնկալում են, որ նա չեղյալ կհայտարարի լեռնահանքահումքային կազմակերպությունների արտոնագրերը, որոնք տրվել են օրենքի խախտումներով, իսկ մեղավորներին` անկախ զբաղեցրած պաշտոնից, կենթարկի պատասխանատվության: