Ընդունել են Ցեղասպանությունը դատապարտող հայտարարություն

Հայոց ցեղասպանության 96-րդ տարելիցի նախօրեին Արգենտինայի խորհրդարանի վերին պալատը` սենատորներ Դանիել Ֆիլմուսի, Ռուբեն Ժուստինիանիի, Էրնեստո Սանսի և Սոնիա Էսկուդերոյի նախաձեռնությամբ, ընդունել է հայտարարություն, որով դարձյալ դատապարտում է Մեծ եղեռնի հեղինակներին:

Փաստաթղթում, մասնավորապես, ասվում է, որ «ապրիլի 24-ի նախօրեին, երբ լրանում է 1915-1923 թթ. Օսմանյան կայսրությունում մարդկության դեմ իրագործված այդ հանցագործության 96–րդ տարելիցը, Ազգային սենատը վերահաստատում է իր որոշումը` ապրիլի 24-ը հռչակել Հանդուրժողականության և ազգերի միջև հարգանքի օր` ի հիշատակ հայ ժողովրդի դեմ գործված ցեղասպանության»:

Հայտարարության մեջ նշվում է նաև, որ «Ազգային սենատը դատապարտում է ՄԱԿ-ի 1948 թ. «Ցեղասպանության կանխարգելման և պատժի մասին» համաձայնագրով նախատեսված ցեղասպանության բոլոր ձևերն ու անհանդուրժողականության և ցեղասպանության ժխտմանն ուղղված բոլոր դրսևորումները և իր համերաշխությունն է հայտնում արգենտինահայ համայնքին»: