Ատոմակայանի սեյսմիկ անվտանգությունն առաջնահերթ խնդիր է

Ատոմակայանի սեյսմիկ անվտանգությունը գերակա խնդիր է, եւ դրան շատ մեծ ուշադրություն են դարձնում. այսօր լրագրողների հետ հանդիպման ժամանակ նշեց Միջուկային անվտանգության կարգավորման պետական կոմիտեի նախագահ Աշոտ Մարտիրոսյանը:

Նա տեղեկացրեց, որ ատոմակայանը նախագծվել է 7 եւ 8 բալ սեյսմիկ գոտու շինարարական չափանիշներով, ինչը նշանակում է, որ եթե լինի 7 բալանոց երկրաշարժ, ապա ատոմակայանը չի վնասվի եւ կշարունակի աշխատել համաձայն նախագծային ռեժիմի. արդեն 6 բալի դեպքում սեյսմիկ պաշտպանության ավտոմատ համակարգն անջատում է ռեակտորը: 8 բալի դեպքում, ըստ Ա. Մարտիրոսյանի, հնարավոր են որոշ ոչ կարեւոր օբյեկտների փլուզումներ ու ճաքեր, որոնք չեն կարող ազդել ատոմակայանի անվտանգության վրա:

«Վերագործարկումից առաջ կատարվեցին ատոմակայանի հարակից տարածքների լրացուցիչ սեյսմիկ ուսումնասիրություններ, որոնց արդյունքում ավելի ուժեղացվեց ատոմակայանի սեյսմակայունությունը»,- նշեց բանախոսը` հավելելով, որ նման աշխատանքներ անընդհատ իրականացվում են եւ կշարունակվեն ընդհուպ մինչեւ ատոմակայանը շահագործումից հանելը: