Ոստիկանները նոր համազգեստ կկրեն

Ապրիլի 16-ին ՀՀ ոստիկանությունը 10-րդ տարեդարձը կտոնի: Այդ օրը` զորահանդեսի ժամանակ, ոստիկանության որոշ ստորաբաժանումներ արդեն հանդես կգան նոր համազգեստով ու նոր տարբերանշաններով:

Կառավարությունն այսօր հաստատել է ոստիկանության ծառայողի նոր համազգեստի նկարագիրը եւ այն կրելու ժամկետները: Ոստիկանապետ Ալիկ Սարգսյանը համոզված է, որ նոր համազգեստն ավելի հարմարավետ է ու նոր ժամանակներին համապատասխան: «Կարծում եմ` նոր համազգեստը ժողովրդին հնարավորություն կտա ոստիկանության նախկին կարծրատիպը մի քիչ թուլացնել եւ ոստիկանության մասին տպավորությունները մի քիչ այլ դարձնել»,- ասաց ոստիկանապետը:

Նրա խոսքերով` ոստիկանության պահպանության վարչության շուրջ 4200 աշխատակիցների համազգեստը կմնա նույնը, քիչ փոփոխությունների կենթարկվի ոստիկանության զորքերում ծառայողների համազգեստը, իսկ արտաքին ծառայությունը, պրոֆիլակտիկ եւ օպերատիվ ծառայությունները, ինչպես նաեւ ճանապարհային ոստիկանությունը կանցնեն նոր համազգեստի: