Օմբուդսմենը պիտի օգնի դուրս գալ իր եփած ճաշից

«Հրապարակ» օրաթերթն այսօր հայց է ներկայացնելու դատարան` թերթի վրա դրված արգելանքը հանելու վերաբերյալ: Նախորդ շաբաթ դատարանը կալանքի տակ է վերցրել թերթի դրամական միջոցները:

Նշենք, որ Ռ. Քոչարյանը դատի է տվել օրաթերթին  իր պատիվը, արժանապատվությունն ու բարի համաավն արատավորելու համար եւ պահանջել է 6 միլիոն դրամ, որը թերթի կես տարվա շրջանառվող գումարն է:

Այսօր լրագրողների հետ հանդիպման ժամանակ «Հրապարակ» օրաթերթի գլխավոր խմբագիր Արմինե Օհանյանը նշեց, որ եթե դատարանը արգելանքը չհանի, չեն կարողանա վճարել տպագրության համար, պարտքեր կկուտակվեն, եւ տպարանը կհրաժարվի իրականացնել թերթի տպագրությունը:

Խոսք եղավ նաեւ օմբուդսմենի պարտականությունների մասին եւ նրա վերջին ուղերձին` ուղղված դատավորներին, որպեսզի նրանք ավելի հանդուրժող լինեն լրատվամիջոցների նկատմամբ: Ա. Օհանյանը նշեց, որ, ի պատասխան այդ ուղերձի, հենց հաջորդ օրը դատարանը կիրառեց օրաթերթի դրամական միջոցները կալանքի տակ առնելու սանկցիան:

«Օրենքի ապաքրեականացումով Հայաստանում մտցվեց բարոյական վնասի ինստիտուտը` լրատվամիջոցների նկատմամբ: Ըստ էության` հերքումն արդեն պատիժ է»,- ասաց Արմինե Օհանյանը` հավելելով, թե ավելի ճիշտ կլինի, որ գործող օրենքում` որպես փոխհատուցում նշված  ահռելի գումարը դարձվի սիմվոլիկ կամ էլ ընդհանրապես գումարային փոխահատուցման կետը հանվի:

Ա.Օհանյանը ասաց նաեւ,  որ լրատվամիջոցների դեմ դատական հայցերի շատանալը կհանգեցնի նրան, որ մամուլը կմոբիլիզացնի իր ուժերը եւ կպահանջի օրենքում փոփոխություններ կատարել: Եվ այս դեպքում շատ կարեւոր է նաեւ մարդու իրավունքների պաշտպանի` Կարեն Անդրեասյանի մասնակցությունը:

«Պետք է այս ամենի մեջ ներքաշել նաեւ օմբուդսմենին, որը եփել է այս ճաշը, եւ հիմա պիտի ամեն ինչ անի, որպեսզի օգնի այս վիճակից մենք դուրս գանք: Եթե ինքը ուզում է կայանալ` որպես պաշտոնյա, որպես անձ, որպես ինստիտուտ, ապա գոնե այդ մի հարցում պիտի կարողանա  հասնել իշխանությունների կողմից արված զիջումներին»,- ասաց Արմինե Օհանյանը եւ հավելեց, որ ունեն փաստաբան եւ իրենց կողմից անում են ամեն ինչ` դատական քաշքշուկներից հաղթած դուրս գալու համար: Սակայն այդ ամենի վրա ծախսված էներգիան, ըստ նրա, կարող էր թերթի զարգացմանն ու մյուս անելիքներին ուղղվել: