Քաղաքացիական ավիացիան կապ չունի հակամարտության հետ

Ստեփանակերտի օդանավակայանի վերաբացման եւ Երեւան-Ստեփանակերտ չվերթեր իրականացնելու հարցը բավական կարեւոր եւ բարդ խնդիր է, որը, սակայն, թե' հայկական, թե' ադրբեջանական կողմը լիովին չեն հասկանում` կտրուկ հայտարարություններ անելով ու հարցը միջազգայնորեն բարձրացնելով:

Այս մասին այսօր լրագրողների հետ հանդիպման ժամանակ ասաց Ռազմավարական եւ ազգային հետազոտությունների հայկական կենտրոնի տնօրեն Մանվել Սարգսյանը: Նրա խոսքերով` հետաքրքիր է հատկապես այն հանգամանքը, որ միջազգային հանրությունը չփորձեց օդանավակայանի վերաբացման խնդիր կապել ԼՂՀ հակամարտության հետ:

«Ես կարծում եմ` վերջին ամիսներին միջազգային քաղաքականության մեջ տեղի ունեցող փոփոխություններից հետո մարդու իրավունքի պաշտանությանն ավելի մեծ տեղ է տրվում: Ի՞նչ է նշանակում, որ եթե հակամարտություն կա, ապա մարդիկ քաղաքացիական ավիացիայից օգտվելու իրավունք չունեն»,- ասաց Մ. Սարգսյանը:

Այսինքն` ներկայումս միջազգային քաղաքականության դաշտում գործում են միջազգային իրավունքի տառին համապատասխան, իսկ միջազգային իրավունքի հիմքում էլ հենց մարդու իրավունքներն են: