Գյուլը Պերեսին Թուրքիա է հրավիրել

Թուրքիայի նախագահ Աբդուլլահ Գյուլը Իսրայելի նախագահի Շիմոն Պերեսին Ստամբուլ այցելելու հրավեր է ուղարկել, ինչը շատ տարօրինակ է, եթե հաշվի առնենք երկու պետությունների լարված հարաբերությունները:

Ինչպես տեղեկացնում է իսրայելական «Եդիոտ Ախրոնոտ» թերթը, իհարկե, Իսրայելում շատերը կարծում են, որ դրանում ոչ մի առանձնահատուկ բան չկա. Պերեսին հրավիրել են մասնակցելու ՄԱԿ-ի համաժողովին, որը տեղի կունենա Ստամբուլում` այս տարվա մայիսին:

Ի դեպ, «Ազատության նավատորմիղի» հետ կապված իրադարձություններից մի քանի օր անց էլ Գյուլը Պերեսին հրավիրել էր մասնակցելու Ասիայի երկրների կազմակերպության համաժողովին, որը նույնպես անցկացվում էր Ստամբուլում:

Սակայն կան տեսակետներ, թե հնարավոր է` դա Անկարայի եւ Երուսաղեմի հարաբերությունների ջերմացման սկիզբն է, ընդ որում` թուրքական կողմը հրավերը համարել է բարի կամքի դրսեւորում:

Թերթի տվյալներով` Պերեսը դեռ չի որոշել` կընդունի՞ թուրք գործընկերոջ հրավերը, թե՞ ոչ: