ՀՅԴ ներկայացուցիչը մասնակցել է Շվեդիայի սոցիալ-դեմոկրատական կուսակցության համագումարին

Մարտի 25-27-ը Ստոկհոլմում տեղի է ունեցել Շվեդիայի սոցիալ-դեմոկրատական կուսակցության արտահերթ համագումարը, որի ընթացքում ընտրվել են կուսակցության նոր ղեկավարը եւ գլխավոր քարտուղարը։

Ժողովին, որպես հրավիրյալներ, մասնակցել են ավելի քան 30 կուսակցությունների ներկայացուցիչներ, այդ թվում` ՀՅ Դաշնակցությունից Գասպար Կարապետյանը (Հունաստան). տեղեկացնում է ՀՅԴ մամլո դիվանը։

ՀՅԴ ներկայացուցիչը առանձնազրույցներ է ունեցել նորընտիր գլխավոր քարտուղարի Կարին Յամտինի, կուսակցության միջազգային քարտուղար Անն Լինդի եւ այլ պատասխանատուների հետ։ Արծարծվել են երկու կուսակցությունների միջեւ հարաբերությունները զարգացնելու անհրաժեշտությունն ու հնարավորությունները։

Գասպար Կարապետյանը հանդիպել է նաեւ հրավիրյալ այլ կուսակցությունների ներկայացուցիչների հետ։ Նա մասնակցել է միջազգային հրավիրյալների համար Ուլոֆ Պալմեի հիմնադրամի կողմից կազմակերպված երկու սեմինարներին։

Տեղեկացնենք, որ Շվեդիայի սոցիալ-դեմոկրատական կուսակցությունը եւ Հայ Յեղափոխական Դաշնակցությունը անդամակցում են Սոցինտերնին: