Փաշինյանի դեմ ճնշումները շարունակվում են

«Հայկական ժամանակ» օրաթերթի գլխավոր խմբագիր, քաղբանտարկյալ Նիկոլ Փաշինյանը  հնարավորություն չունի հարազատների եւ փաստաբանի միջոցով իր հոդվածներն արտաքին աշխարհ ուղարկելու: Այս մասին լրագրողների հետ հանդիպման ժամանակ հայտարարեց Փաշինյանի փաստաբան Վահե Գրիգորյանը:

Նրա պնդմամբ` իր հետ հանդիպումից առաջ  Փաշինյանին խուզարկում են եւ վերցնում ամեն ինչ:

Փաստաբանը նաեւ հավաստիացրեց, որ քրեակատարողական հիմնարկի վարչակազմից 3 անգամ հորդորել են Փաշինյանին` դադարեցնել հոդվածներ գրել: Իսկ վերջերս էլ անընդհատ վերցնում են Փաշինյանի մոտ եղած թուղթն ու գրիչը:

«Քրեակատարողական հիմնարկի աշխատակիցներն անմեղ հայացքով նայում են վրաս ու ասում, որ նման բան չի եղել: Իսկ Փաշինյանի հոդվածները` ծրարով, քրեակատարողական հիմնարկի պետ Սարգսյանն իր մոտ է պահում»,- ասաց փաստաբանը:

ԵՐԿԻՐ-ի հարցին, թե ինչին են միտված այդ կողմնապահությունները եւ անտարբերությունը, փաստաբանը պատասխանեց, որ, առաջին հերթին, Փաշինյանի լրագրողական գործունեության խոչընդոտմանը եւ Եվրոպական դատարան դիմելու իրավունքի խախտմանը, թեեւ իրենք արդեն դիմել են դատարան: