Ինտերնետային մարաթոն է լինելու

«Գիրք-2011» ինտերնետային մարաթոնը, որն առաջինն է հայաստանյան իրականությունում, տեղի է ունենալու մարտի 13-ին: Դրա նպատակը գրքեր հավաքագրելն ու Հայաստանի հեռավոր բնակավայրերի գրադարաններին, դպրոցներին, զորամասերին նվիրաբերելն է:

Ինչպես ֆեյսբուքային էջում գրում է մարաթոնի նախաձեռնողներից Աննա Նաղաշյանը, սոցիալական ցանցերի եւ էլեկտրոնային փոստի օգնությամբ տպագիր գրականություն է հանգանակվելու այն գրադարանների համար, որոնք վերջին 20-25 տարիներին ոչ միայն չեն համալրվել, այլև էական կորուստներ են ունեցել:  

Բոլոր նրանք, ովքեր ունեն գրքեր, ամսագրեր եւ ցանկություն ունեն դրանք նվիրելու կարող են կապվել կազմակերպիչների հետ եւ հանձնել նվերը: Ի դեպ, բոլոր գրքերի վրա լինելու են նվիրողների անուն-ազգանունները:  

«Մենք հույս ունենք, որ մեզանից ամեն մեկը պատրաստ է գոնե մինինալ չափով օգնել ու միանալ այս հետաքրքիր գործին»,- գրում է Աննա Նաղաշյանը:

Ի դեպ, քանի որ այդ օր նաեւ Եղիշե Չարենցի ծննդյան օրն է, «Գիրք-2011» ինտերնետային մարաթոնի նախաձեռնող խումբն այդ կապակցությամբ կազմակերպում է այցելություն այն վայրը, որտեղ թաղված է եղել մեծ բանաստեղծը:

Բոլոր նրանք, ովքեր կցանկանան մասնակից դառնալ հիշատակի ու ոգեկոչման արարողությանը, մարտի 13-ին` ժամը 11-ին, կարող են գալ Իսակովի պողոտա` «Տոյոտա» խանութի մաոտ: Մարաթոնի մասնակիցներն իրենց հետ կարող են բերել նվիրաբերվող գրքերը: