Մահացությունների թիվն աճել է

ԼՂՀ ազգային վիճակագրական ծառայության տվյալներով՝ 2010 թ., նախորդ տարվա համեմատ,  ավելացել  է մահացությունների թիվը. մահացել է 1341 մարդ,  նախորդ տարի` 1266:

Օրերս հրավիրած մամուլի ասուլիսում ժողովրդագրական ցուցանիշները ներկայացնելու ժամանակ ծառայության նախագահ Մանուշ Մինասյանը տեղեկացրել է, որ մեռելածինների թիվը նույնպես աճել է՝ 13 երեխա, նախորդ տարի` 7: Մինչեւ 1 տարեկան մահացած երեխաների թիվը նույնպես աճել է՝ 30-ից հասնելով 34-ի: Տարվա ընթացքում մայրական մահացության դեպք չի գրանցվել, ինչպես նախորդ մի քանի տարիներին:


«Ըստ հիվանդության դասերի` մահացածության պատճառական կառուցվածքում բարձր տեսակարար կշիռ ունեն արյան շրջանառության համակարգի հիվանդությունները` 66.1տոկոս»,- տեղեկացրել է Մանուշ Մինասյանը:

Վիճակագրական տվյալներով` մինչեւ 70 տարեկան մահացածները կազմել են ընդհանուրի 26,1 տոկոսը, 70-74 տարեկանները` 12,5 տոկոսը, 75-79 տարեկանները` 15.8 տոկոսը, 80-84 տարեկանները` 22.8տոկոսը, 85 եւ բարձր տարիքի մահացածները` 22,8 տոկոսը: