Էրդողանը ֆավորիտ է

Հունիսի 12-ին Թուրքիայում տեղի ունենալիք խորհրդարանական ընտրություններին մասնակցելու են մոտ երկու տասնյակ կուսակցություններ, սակայն հիմնական  պայքարը լինելու է  «Արդարություն եւ զարգացում», Ժողովրդահանրապետական եւ «Ազգայնական շարժում» կուսակցությունների միջեւ։

Թուրքագետ Լեւոն Հովսեփյանը տարբեր սոցիոլոգիական հետազոտությունների արդյունքներն ուսումնասիրելիս եկել է այն եզրահանգման, որ ֆավորիտը Էրդողանի ղեկավարած «Արդարություն եւ զարգացում» կուսակցությունն է:

Այն, ամենայն հավանականությամբ, նույն արդյունքները կունենա, ինչ 2007-ի ընտրություններին, երբ խորհրդարանում բացարձակ մեծամասնություն կազմեց:

Թուրքագետի ներկայացրած տվյալների համաձայն` նախատեսվում է, որ ընտրություններին Էրդողանի կուսակցությունը կստանա ձայների 48.8 տոկոսը, Ժողովրդահանարապետականը՝ 28 տոկոսը, «Ազգայնական շարժումը»՝ մոտ 10 տոկոսը։ Իսկ մյուս կուսակցությունները հազիվ թե հաղթահարեն 10 տոկոսի ընտրական շեմը:

Բարձր է նաեւ Էրդողանի անձնական վարկանիշը` 46 տոկոս, Ժողովրդահանրապետական կուսակցության ղեկավարինը`  24 տոկոս է, «Ազգայնական շարժման» առաջնորդինը՝ 9 տոկոս: