Կառավարության հերթական "լավությունը"

Կառավարության որդեգրած նոր վարքագիծը, ըստ ՀՅԴ խմբակցության պատգամավոր Արծվիկ Մինասյանի, հետեւյալն է.  «Ընդունել տանք վատթարագույն օրենքներ: Եթե դրանք արժանանան հասարակության դիմադրությանը` կառավարությունը մի փոքր մեղմացում կտա ու կասի, որ տեսե'ք, ինչ լավ կառավարություն եմ, լավություն եմ անում ձեզ: Այդպիսի դեպքերը շատ են»,- հայտարարեց պատգամավորը այսօր ԱԺ-ում «Ժամանակավոր անաշխատունակության նպաստների մասին» ՀՀ օրենքում փոփոխություններ եւ լրացումներ կատարելու մասին օրինագծի քննարկման ժամանակ:

Կառավարության ներկայացրած նախագծով` եթե անձը մինչեւ  ժամանակավոր անաշխատունակության առաջացմանը նախորդող 12 ամիսներին անընդհատ աշխատել է, ապա նրա հղիության եւ ծննդաբերության նպաստի միջոցով տրամադրվող փոխհատուցումը կկազմի միջին աշխատավարձի 100 տոկոսը: Իսկ եթե այդ ժամանակահատվածում անձը 12 ամսից պակաս է աշխատել, ապա նրա նպաստի չափը համամասնորեն կնվազի:

Կառավարության ներկայացրած նախագծով առաջարկվում է սահմանել նաեւ, որ ժամանակավոր անաշխատունակության նպաստը տրվում է նաեւ ժամանակավոր անաշխատունակության ժամանակահատվածի տոնական ոչ աշխատանքային օրերի համար:

Հիշեցնենք, որ 2010 թ. հոկտեմբերի 27-ին ընդունված եւ դեկտեմբերի 1-ին ուժի մեջ մտած այս օրենքն առաջացրել էր ապագա մայրերի դժգոհությունը: