Կրոնական ազատությունը` ժողովրդավարության չափանիշ

Այսօր` Միջդավանական ներդաշնակության շաբաթվա շրջանակներում կազմակերպված կլոր սեղանի ընթացքում քննարկումներ եղան Հայաստանում կրոնի կամ դավանանքի ազատության օրենսդրության վերաբերյալ: Միջոցառմանը մասնակցում էին ՀՀ պետական կառույցների, քաղաքացիական հասարակության եւ կրոնական կազմակերպությունների, ինչպես նաեւ միջազգային հանրության ներկայացուցիչներ:

Բացման խոսքով հանդես եկավ ՀՀ արդարադատության նախարար Հրայր Թովմասյանը, ով նշեց, որ հասարակության հետաքրքրությունը այդ հարցում մեծ է:

«Կրոնական ազատությունը ժամանակակից աշխարհում ժողովրդավարական առաջնային չափանիշներից է համարվում, սակայն ցանկացած իրավական կարգավորում եւ սահմանում զգոնություն է պահանջում»,- ասաց նա:

Նախարարը նորմալ  համարեց այն երեւույթը, որ նոյեմբերի 26-ին համապատասխան օրենքում փոփոխություն եւ լրացում կատարելու համար Հայաստանը ԵԱՀԿ-ի կողմից արժանացել է քննադատության:

Վիճահարույց են համարվել հատկապես հոգեորսության հիմնախնդիրը, աղանդների ստեղծման եւ գրանցման հարցերը, կրոնական կրթության հիմնահարցը:

Վենետիկի հանձնաժողովի անդամ Ֆինոլա Ֆլենեգան էլ  ասաց, որ շատ կարեւոր է իսկապես ազատություն ունենալ կրոնի մեջ եւ ողջունեց մամուլի ակտիվությունն այս հարցում: