Վիսոցկու դերակատարի անունը գաղտնի է պահվում

2011-ը Ռուսաստանում հայտարարված է Վլադիմիր Վիսոցկու տարի: Սակայն նրան նվիրված միջոցառումները սկսվել են 2010-ից: 

2010-ին ռեժիսոր Ալեքսանդր Կովանովսկին նկարահանել է «Վլադիմիր Վիսոցկի. անծանոթ, ում ճանաչում էին բոլորը» փաստավավերագրական ֆիլմը, որն աղմուկ  է հանել իր անկեղծությամբ եւ մինչ այդ չցուցադրված բացառիկ կադրերի շնորհիվ:

Դրանք հայտնաբերվել էին Լեհաստանում` մասնավոր հավաքածուներում. նկարահանված են 1967-ին լեհ կինոգործիչների հետ Վլադիմիր Վիսոցկու ոչ պաշտոնական հանդիպման ժամանակ:

Ֆիլմում փորձ է արվել մեզ հայտնի Վիսոցկուն ներկայացնել լրիվ այլ տեսանկյունից:

Իսկ 2011-ին էկրան կբարձրանա  Վիսոցկու մասին եւս մեկ ֆիլմ` այս անգամ գեղարվեստական:

Ռուս կինոգործիչների կարծիքով` ֆիլմը հավակնում է դառնալ 2011-ի լավագույն ֆիլմը, իսկ դերասան Զոլոտուխինի կարծիքով` այն կկարողանա մրցել հոլիվուդյան  լավագույն ֆիլմերի հետ, անգամ գերազանցել  դրանք:

Ֆիլմի ստեղծման աշխատանքներին մասնակցել են ռուսական կինոբոհեմի լավագույն ներկայացուցիչները: Ամենադժվարը եղել է Վիսոցկու դերակատարի ընտրությունը: Վիսոցկու տղայի խոսքերով` իր հոր դերակատարը ոչ միայն պետք է  լիներ հիանալի դերասան ու լավ երգիչ, այլ նաեւ պետք է ունենար ամենակարեւորը` Վիսոցկու ոգին:

Բոլոր այն մարդիկ, ովքեր դիտել են ֆիլմից հատվածներ կամ մասնակցել են  նկարահանման աշխատանքներին, հայտնում են  իրենց բացարձակ հիացմունքը Վիսոցկու դերակատարի խաղի վերաբերյալ: Ինչպես նշում է Վիսոցկու տղան, այդ դերասանից բացի, Վիսոցկուն  այդպես կկարողանար խաղալ միայն հենց ինքը` Վլադիմիր Վիսոցկին:

Ստեղծագործական խմբի պահանջով Վիսոցկու դերակատարի անունը պահվում է խիստ գաղտնի` մինչեւ ֆիլմի պրեմիերան հանդիսատեսի մեջ լարվածություն ավելացնելու նպատակով: Միայն հայտնի է, որ արվել է բացառիկ գրիմ, որի շնորհիվ ստացվել է, ոչ թե Վիսոցկուն նման դեմք, այլ հենց Վլադիմիր Վիսոցկու դեմքը` ամենայն ճշտությամբ: