Արցախը պատկերասրահ կունենա

Արցախում շուտով բացվելու է Ազգային պատկերասրահ: Ծրագրի նախաձեռնողը ակադեմիկոս, բարերար Գրիգոր Գաբրիելյանցն է: Նա քսանմեկ նկարներից բաղկացած իր հավաքածուն նվիրաբերելու է Արցախի Ազգային պատկերասրահին:

Գաբրիելյանցի նախաձեռնությանը միացել են նրա ընկերներն ամբողջ աշխարհից, նաեւ Հայաստանի նկարիչների միությունը. ներկայումս պատկերասրահում ցուցադրվելիք նկարների թիվը հասնում է մոտ 300-ի:

Այսօր այդ նկարները նախ ցուցադրվելու են Հայաստանի նկարիչների միությունում: Ցուցահանդեսը տեւելու է չորս օր, այնուհետեւ նկարները տեղափոխվելու են Ստեփանակերտ:

Ըստ Հայաստանի նկարիչների միության նախագահ Կարեն Աղամյանի` Արցախում պատկերասրահի բացումն ունի նաեւ քաղաքական մեծ նշանակություն. «Այն ժամանակ, երբ Ադրբեջանն անընդհատ խոսում է զենքի ավելացման, բանակի հզորացման մասին, մենք ապացուցում ենք, որ մշակույթ, այսինքն` խաղաղություն արարող մարդիկ ենք»:

Պատկերասրահի պաշտոնական բացումը նախատեսվում է սեպտեմբերին: Ներկայումս կարգավորվում են պատկերասրահի շենքային հարցերը: