Պատգամավորը հայհոյել է լրագրողին

Տեղեկանալու համար, թե «Հայկական ժամանակի» հրապարակումից հետո ի՞նչ բարոյական վնաս է կրել ԱԺ պատգամավոր Ռուբեն Հայրապետյանը, «Հետք» էլեկտրոնային օրաթերթի լրագրող Գրիշա Բալասանյանը զանգահարել է նրան:

Երբ ներկայացել է, լսել է Ռուբեն Հայրապետյանի հարցը. «Էդ ի՞նչ թերթ ա, օրական ըտենց մի թերթ ա բացվում, ու որոշում եք, որ ինձ պիտի զանգե՞ք»:

- Իսկ Ձեզ զանգելը արգելվա՞ծ է:

- Տգե՜տ, ես լրատվական ծառայություն ունեմ, «չերեզ» լրատվական ծառայություն իմ հետ կապնվի,- ասել է պատգամավորը եւ անջատել հեռախոսը:

Գրիշա Բալասանյանը գրում է. «Ես, որ լուսաբանում եմ ԱԺ-ի աշխատանքները, գիտեմ, որ որեւէ պատգամավոր լրատվական ծառայություն չունի: Երբ կրկին զանգահարեցի, որպեսզի պատգամավորից ճշտեմ նման պահվածքի ու լրագրողին վիրավորելու պատճառը, Ռուբեն Հայրապետյանը նախ ճշտեց` արդյո՞ք զրույցը ձայնագրում եմ, թե՞ ոչ, իսկ երբ տեղեկացավ, որ ձայնագրվում է, սեռական բնույթի հայհոյանքներ սկսեց տալ: Վերջում էլ ավելացրեց. «Լավ արեցի»: