Կառավարությունը մեղքը գցել է տրանսպորտի նախարարության վրա

Մաքսատուրքերի բարձրացման դեմ բողոքող տոնավաճառի աշխատակիցները շարունակում էին սպասել կառավարության պատասխանին: Նրանցից միայն չորսին  ժամը 16:40-ին ներս կանչեցին: Հանդիպումը եղել էր կառավարության աշխատակազմի ղեկավարի հետ:

«Ասաց, որ կառավարությունը պարզապես տեղյակ չէ գնային բարձրացումից: Բարձրացումն արվել է բեռանափոխադրողների կողմից: Տրանսպորոտի նախարարին հրահանգ է տրվել, որ սեղմ ժամկետներում անպայման հարցը լուծվի»,- ասաց հանդիպմանը մասնակցած Գեւորգ Սարոյանը:

Հանդիպման ժամանակ նրանց ասել են նաեւ, թե մաքսային որեւէ ծառայություն չի թանկացել, հավանական է, որ բեռանփոխադրող ընկերություններն են գինը բարձրացրել: եվ եթե պարզվի, որ դա անհիմն է, ապա կզրկվեն այդ գործով զբաղվելու լիցենզիայից:

Հավանական է նաեւ, որ թուրքական կամ վրացական կողմը բեռանափոխադրման գինը թանկացրած լինի: Պատճառները կճշտի տրանսպորտի եւ կապի նախարարությունը:

Իսկ այն ապրանքը, որն արդեն Հայաստանում է, մինչեւ վաղը ժամը 17-ը պարզ կդառնա` տերերն այն ստանալու համար 1կգ-ի դիմաց  4, թե 8 դոլար են վճարելու:

Ցուցարարները որոշեցին վաղը ժամը 17-ին հավաքվել տրանսպորտի եւ կապի նախարարության շենքի մոտ: