ՀԱՅՈՑ ԱՇԽԱՐՀ. Ձերբակալել են փաստաբանին

Ոստիկանության կազմակերպված հանցավորության դեմ պայքարի գլխավոր վարչության եւ Երեւանի քաղաքային վարչության աշխատակիցները քաղաքացուց գումար ստանալու պահին ձերբակալել են մի փաստաբանի:

Քաղաքացի Անահիտ Հակոբյանը ոստիկաններին հայտնել էր, թե Արշակ Մկրտչյանը, որը մասնագիտությամբ փաստաբան է՝ հիմնականում քաղաքացիական գործերով, 2010-ի դեկտեմբերին իրենից վերցրել է 1.000 դոլար: Ըստ Ա.Մկրտչյանի, գումարը որպես կաշառք տվել է վերաքննիչ դատարանի դատավորին: Վերջինս պետք է որոշում կայացներ՝ Հակոբյանի քաղաքացիական գործը հետ քննության ուղարկելու մասին (այդ գործով վճիռ էր կայացվել Մալաթիա-Սեբաստիա վարչական շրջանների ընդհանուր իրավասության դատարանի կողմից):

2011-ի հունվարին Ա.Մկրտչյանը Հակոբյանից այս անգամ պահանջում է 1.500 դոլար՝ պատճառաբանելով, որ այդ գումարի մի մասը պետք է փոխանցի դատավորին: 1.500 դոլարն ստանալու պահին փաստաբանը ձերբակալվել է: