Սյունիքը բնապահպանական աղետի շեմին

Այսօր հրավիրված մամլո ասուլիսի ժամանակ Կապանի Շահումյան եւ Բանավան թաղամասի բազմամետաղային հանքը բաց եղանակով շահագործելու մասին իրենց մտահոգություննրը արտահայտեցին «էկոլոգիական հասարակական դաշինք» ՀԿ-ի անդամները:  Ըստ նախնական տվյալների` մինչեւ տարեվերջ հանքավայրը բաց եղանակով շահագործվելու է, ինչն, ըստ բնապահպանների, հսկայական բնապահպանական եւ առողջապահական խնդիրներ կառաջացնի Սյունիքում։ Բնապահպանների հետազոտություններով` Սյունիքի որոշ տարածաշրջաններում ջրի, հողի եւ սննդամթերքի մեջ ծանր մետաղների առկայությունը սահմանային թույլատրելի նորման գերազանցում է մի քանի անգամ։ Նրանց խոսքով, պատասխանատու պետական գերատեսչությունները չեն հետաքրքվում հիմնախնդրով։ «Էկոլոգիական հասարակական դաշինք» ՀԿ-ի անդամները ստացել են ահազանգեր, ըստ որոնց՝ հանքի շահագործման արդյունքում Կապանում 50 հազար ծառ է հատվելու։ Սակայն Կապանի քաղաքապետը հերքել է` ասելով, որ 7000 ծառի է հատվելու: «Մենք հարց ենք տալիս մեր կառավարությանը՝ արդյոք կառավարությունը միայն հանքեր շահագործելու մասի՞ն է մտածում եւ ոչ թե ժողովրդի առողջության»,– ասաց դաշինքի անդամ Սիլվա Ադամյանը:

Բնապահպանները տեղեկացրեցին, որ դիմելու են Եվրոպական բանկին եւ կանադական ներդրողներին` ներկայացնելով վիճակն ու պահանջելով չֆինանսավորել: