Տիգրան Կարապետյանին զրկեցին մարդկանց վրա ազդելու լծակից

«Սրանով ցանկացան զրկել ինձ եթերից եւ 2012-ի նախընտրական փուլում իմ ազդեցությունը, վարկանիշը հասարակության շրջանում բարձրացնելու հնարավորությունից»,- «Երկիր»-ին ասաց «ԱԼՄ-Հոլդինիգի» նախագահ Տիգրան Կարապետյանը:

Նրա կարծիքով` «ԱԼՄ» հեռուստաընկերությանը եթերից զրկելու ՀՌԱՀ-ի որոշումը կամայական, անարդար էր եւ քաղաքական  բնույթ ուներ: Նա նշեց, որ իրենց մրցակից եւ մրցույթում հաղթած «Երեւան» հեռուստաընկերությունը «ԱԼՄ»-ին զիջում էր նկատելիորեն:

Եթե «Երեւանն» ունի 42 աշխատակից, իրենք ունեն` 83: «ԱԼՄ»-ն ունի սեփական շենք, 10 տաղավար, 18 հեղինակային հաղորդում, 13 հաղորդակ, այնինչ` «Երեւանը» շենք չունի, ունի մեկ տաղավար, 2 հեղինակային հաղորդում, մեկ հաղորդակ: «ԱԼՄ»-ն 600 հազար դրամի ներդրում պետք է աներ, իսկ «Երեւանը»` 400 հազարի:

«ԱԼՄ»-ի հիմնադիրն ասաց, որ ՀՌԱՀ որոշումը բողոքարկելու են, հարկ եղած դեպքում նույնիսկ դիմելու են Եվրադատարան: Իսկ թե կմիանա՞ն «Ա1+»-ին, դեռ պարզ չէ: Այս հարցը քննարկում են: