Աճառյանի անվան լեզվի ինստիտուտը եւ ''Ազդակ'' օրաթերթը կհամագործակցեն

ՀՀ ԳԱԱ Հ.Աճառյանի անվան լեզվի ինստիտուտում հյուրընկալվել է  Լիբանանի հայկական «Ազդակ» օրաթերթի գլխավոր խմբագիր Շահան Գանտահարյանը: Նա ինստիտուտի գիտաշխատողներին ներկայացրել է օրաթերթի անցած ուղին, ներկա խնդիրներն ու ապագայի ծրագրերը:

Պատասխանելով լեզվաբանների հարցերին՝ Գանտահարյանն անդրադարձել է լիբանանահայության առջև ծառացած խնդիրներին, մարտահրավերներին, հայապահպանության ուղղությամբ գործադրվող ջանքերին:

Լեզվի ինստիտուտի տնօրեն Վիկտոր Կատվալյանը հայտնել է, որ 2013-ին լրանում է գիտական հաստատության հիմնադրման 70-ամյակը, ներկայացրել տասնամյակների ընթացքում ինստիտուտի գիտաշխատողների ձեռքբերումները հայերենագիտության ոլորտում, ներկայումս կատարվող հետազոտական աշխատանքների հիմնական ուղղությունները: Նա նշել է նաև, որ աշխատանքներ են ծավալվել արևմտահայերենի վիճակը և գրական արևմտահայերենի համակարգը ուսումնասիրելու, կանոնարկման գործընթացներին գործուն մասնակցություն ունենալու ուղղություններով:

«Ազդակ»-ի գլխավոր խմբագիրը լեզվի ինստիտուտի գիտաշխատողներին շնորհակալություն է հայտնել ջերմ ընդունելության համար և սիրով ընդունել համագործակցելու հրավերը. տեղեկացնում է ՀՀ ԳԱԱ տեղեկատվական-վերլուծական կենտրոնը: