Որոշ քաղաքական ուժեր կհամագործակցեն ''Ժառանգության'' հետ

«Ժառանգություն» խորհրդարանական խմբակցության ղեկավար Ռուբեն Հակոբյանը, լրագրողների հետ հանդիպման ժամանակ ամփոփելով ԱԺ-ում  խմբակցության գործունեությունը, փաստեց, որ, չնայած խմբակցության անդամների թվի նվազմանը, «Ժառանգությունը» ԱԺ-ում  բավականին ակտիվ գործունեություն է ծավալել: Ըստ նրա` խմբակցությունն իր հիմնական գործունեությունը կշարունակի նույնքան հետաքրքիր և արդյունավետ:

Անդրադառնալով ընդդիմության միասնական թեկնածուի հավանականությանը` Հակոբյանն ասաց, որ այսօրվա քաղաքական դաշտում առկա իրավիճակը դրա գործնական  հնարավորությունը բացառում է:  «Թեև միասնական թեկնածուի հարցը բազմիցս շահարկվեց, սակայն որևէ դրական արդյունքի չհանգեց, ընդհակառակը, ընդդիմությունը որոշակի պառակտում ապրեց,  ինչն այս պահին ձեռնտու է իշխանություններին»,- ասաց նա և հավելեց, որ ընդդիմությունը ավելի շատ  պետք է մտածեր ընդդիմադիր զանգվածի ձայները պահելու մասին, որպեսզի հնարավոր լիներ  երկրորդ փուլ դուրս գալ:

Ինչ վերաբերում է Րաֆֆի Հովհաննիսյանի` միասնական թեկնածու լինելու հարցին, Հակոբյանը նշեց, որ Հովհաննիսյանը այս ընթացքում ցույց տվեց, որ որևէ ստվերային գործարքի  չի մասնակցել և համագործակցել:  «Նա իր բարոյական նկարագրով արժանի է լինել ընդդիմության միասնական թեկնածու»,- ասաց նա:

Հակոբյանը նաև նշեց, որ կան քաղաքական ուժեր, որոնք ցանկանում են համագործակցել  «Ժառանգության» հետ, սակայն առայժմ  չցանկացավ դրանք հրապարակել: 

Ներկա նախընտրական գործընթացը համեմատելով  1996թ. ընտրական գործընթացի հետ` խմբակցության ղեկավարը նշեց, որ չեն բացառվում հնարավոր շրջադարձային զարգացումներ: