5.800 դոլար՝ քրիստոնյա կնոջ գլուխը թռցնելու համար

Պակիստանի հոգևոր առաջնորդը 5.800 դոլար պարգև է խոստացել՝ քրիստոնյա կնոջը սպանելու համար, տեղեկացնում է CNN-ը: Վերջինս անարգանքի համար դատապարտվել է մահապատժի, սակայն կառավարությունը վիճարկել է որոշումը:

Մուլանա Յուսուֆ Քուրեշին այս մասին ուրբաթ օրն է հայտարարել: Նա դատապարտել է Պակիստանի նախագահ Ասիֆ Ալի Զարդարի՝ Ասյա Բիբիին ազատ արձակելուն ուղղված ցանկացած քայլը և ասել է, որ ինքը և իր հետևորդները կիբողոքեն, եթե Պակիստանի «անարգանքի մասին օրենք»-ի մեջ փոփոխություններ արվեն:

«Ես կվճարեմ 500.000 ռուփի (5.800 ԱՄՆ դոլար) Մուհամեդի այն հավատարիմ հետևորդին, ով կգլխատի Ասյա Բիբիին»,- հավաքված ամբոխին ասել է Քուրեշին:

Նոյեմբեր ամսին Պակիստանի դատարանը 45-ամյա Ասյա Բիբիին Մուհամեդին վիրավորելու համար դատապարտել էր մահվան: Ըստ Պակիստանի օրենսդրության՝ նա խախտել էր անարգանքի մասին օրենքը,  հանցագործություն, որն ըստ Պակիստանի քրեական օրենսգրքի պատժվում է մահապատժով կամ ցմահ ազատազրկմամբ:

Այս դեպքի մասին ավելին կարող եք կարդալ այստեղ