Փարիզի մի շարք շրջաններում պարետային ժամը երկարաձգվել է

Փարիզի առանձին շրջաններում պարետային ժամը երկարաձգվել է. այն կգործի ամեն գիշեր՝ մինչև հոկտեմբերի 26-ի առավոտ: «Արմենպրես»-ի փոխանցմամբ՝ այս մասին հաղորդում է Le Figaro-ն։

Փարիզի ոստիկանության պրեֆեկտուրայի որոշման համաձայն, որը հրապարակվել է հոկտեմբերի 22-ին, Հանրապետության հրապարակի և Լե Ալ թաղամասի շրջանում պարետային ժամի գործողությունը երկարացվում է. այն կգործի ամեն գիշեր՝ ժամը 23:00-ից մինչև առավոտյան 06:00-ը և կշարունակվի մինչև հոկտեմբերի 26-ի առավոտ։

Այս միջոցը սահմանվել է հոկտեմբերի 17-18-ին տեղի ունեցած բռնություններից և թալանից հետո։

Բացի այդ, ոստիկանության պրեֆեկտուրան կրկին արգելք է սահմանում «ցանկացած չհամաձայնեցված հավաքի» համար՝ մինչև հոկտեմբերի 23-ի երեկո։ Այս արգելքը, մասնավորապես, վերաբերում է Ելիսեյան պալատի, Ազգային ժողովի, Սենատի, Ելիսեյան դաշտերի, ինչպես նաև կայարանների հարակից տարածքներին։

Սահմանափակումները տարածվում են ինչպես չափահասների, այնպես էլ անչափահասների վրա։