ԵԱՏՄ-ում շարունակվում են բանակցությունները նավթի և նավթամթերքների միասնական շուկայի շուրջ․ Օվերչուկ

ԵԱՏՄ երկրները շարունակում են բանակցությունները նավթի և նավթամթերքների միասնական շուկայի ստեղծման շուրջ։ Այս մասին հայտնել է Ռուսաստանի փոխվարչապետ Ալեքսեյ Օվերչուկը: Նրա խոսքերը մեջբերում է ՌԻԱ Նովոստի գործակալությունը։

«Ինչ վերաբերում է նավթի և նավթամթերքների միասնական շուկային, ապա այդ բանակցությունները շարունակվում են», - լրագրողներին հայտնել է Օվերչուկը:

Նա նաև նշել է, որ Ռուսաստանը շահագրգռված է, որպեսզի ԵԱՏՄ բոլոր երկրները զարգանան և հնարավորություն ունենան օգտվել վառելիքի առավել շահավետ պայմաններից:

«Վառելիքը արտադրության ինքնարժեքի առանցքային բաղադրիչն է։ Մեզ համար կարևոր է, որ ԵԱՏՄ անդամ պետությունները նման հնարավորություն ունենան։ Թեև, իհարկե, ամենաշահավետ մատակարարումները միշտ եղել են և կշարունակեն լինել Ռուսաստանից», - ընդգծել է Օվերչուկը։