Իշխանության հաշվարկով Վեհափառին դատվածության պիտակ վերագրելով` կհաջողվի ապահովել նրա հեռացումը. Ղամբարյան

Իրավաբանական գիտությունների դոկտոր, պրոֆեսոր Արթուր Ղամբարյանն անդրադարձել է Հայաստանի Հանրապետության կառավարության 2026-2031 թվականների ծրագրի «Հոգևոր անվտանգություն» ենթավերնագրին, որտեղ գրված է.

«Հայաստանյայց Առաքելական Սուրբ Եկեղեցին բարենորոգելու նպատակով ջանքեր են գործադրվելու հետևյալ օրակարգի իրագործման համար՝

1. Ապահովվելու է Հայաստանյայց Առաքելական Սուրբ Եկեղեցու փաստացի պետի հեռացումը (հանգստի կոչումը), և սահմանված կարգով իրականացվելու է Կաթողիկոսական տեղապահի ընտրություն»»։

«Ամենայն Հայոց Կաթողիկոսի դեմ հարուցված քրեական հետապնդումը պետք է դիտարկել այս քաղաքական ծրագրի իրականացման համատեքստում:

Հետագան ցույց կտա, թե Հայաստանի Հանրապետության դատական համակարգը, որը վաղուց ի վեր դադարել է հանդիսանալ դատական իշխանություն, արդյոք կկազմի այս` ոչ լեգիտիմ իշխանության կողմից մշակված քաղաքական ծրագրի մաս, թե ոչ:

Հասարակության մեծամասնության կարծիքն այլևս չարտահայտող այս իշխանության (49 %-անոց ընտրական կլեպտոկրատիայի) տրամաբանությունը և հաշվարկը, ամենայն հավանականությամբ, այն է, որ Վեհափառին քրեական հանցանքի մեջ մեղավոր ճանաչելով և նրան դատվածության պիտակը վերագրելով` այս անգամ կհաջողվի ապահովել նրա հեռացումը»,-գրել է Ղամբարյանը: