Ես միայն Աստծուց եմ վախենում, ինձ իրենք ահ տալ չեն կարող. Տեր Օշին

ԱԺ փոխնախագահ Ռուբեն Ռուբինյանը ֆեյսբուքյան իր էջում գրել է, թե օրերս Սաղմոսավանքի հոգևոր հովիվ Տեր Օշինը իրեն ծանոթ մի երիտասարդ զույգի, որը պատրաստվում է պսակադրվել, ասել է. «կարևորը քավորը նորմալ տղա լինի, թասիբով տղա լինի, նկատի ունեմ՝ ՔՊ-ական չլինի».

«Միայն սրա համար պառակտիչ Կտրիճ Ներսիսյանը պիտի դուրս շպրտվի Եկեղեցուց՝ իր բարեկամների հետ միասին։

Իսկ Տեր Օշինին խորհուրդ եմ տալիս խելքը գլուխը հավաքել»,- գրել է Ռուբինյանը:

«News.5tv.am»-ը կապ հաստատեց Տեր Օշինի հետ, նա, անդրադառնալով թեմային, ասաց.

«Ես ցանկացածին էլ ասել եմ, որ հայրենասեր լինի, հայրենավաճառ չլինի և Հայ առաքելական եկեղեցու ճշմարիտ զավակ լինի, թասիբով հայ լինի, և ես ցավում եմ իր համար որ, լինելով Սաղմոսավանքի հոգևոր հովվի ժառանգ, իրեն թույլ է տալիս Վեհափառ Հայրապետին ավազանի անունով դիմել և առհասարակ խառնվել եկեղեցու գործերին։ Իրեն էլ հստակ ասում եմ՝ ես միայն Աստծուց եմ վախենում, ինձ իրենք ահ տալ չեն կարող»,- ասաց Տեր Օշինը՝ հավելելով, որ եթե իրենց վրա են վերցրել, ասելիք չունի, ու եթե Ռուբինյանը ասելու բան ունի, ապա իր տեղը գիտի:

Ի դեպ, մեր տեղեկություններով, Ռուբեն Ռուբինյանի պսակադրությունը հենց Տեր Օշինն է կատարել: