Հալեպում սիրիական բանակի և քրդական խմբավորումների միջև բախումները հանդարտվել են․ Yerkir.am-ի բացառիկ մանրամասերը

«Հալեպի հայ համայնքը հազիվ էր ավարտին հասցրել Սուրբծննդյան արարողությունները, երբ ուժեղ պայթյունի ձայն լսվեց Նոր Գյուղի մոտակայքում, որից հետո փոխադարձ հրաձգություն և ռմբակոծումներ սկսվեցին քրդերի գլխավորած «Սիրիական դեմոկրատական ուժեր» կոալիցիայի ուժերի և սիրիական բանակի միջև»,- Yerkir.am-ին հայտնեցին Հալեպի «Գանձասար» պարբերականից։

Ըստ մեր աղբյուրի՝  բախումները նախ սկսվել են Հալեպի հյուսիսարևելյան  շրջանի Շեյհան խաչմերուկի մոտ, ապա տարածվել և փոխադարձ հրաձգության են վերածվել  քրդաբնակ Շեյխ-Մաքսուդ, Աշրաֆիե շրջաններում։

Բախումների կենտրոնը, ըստ պարբերականի, գտնվում է հայաբնակ թաղամասերի մերձակայքում, և, ինչպես հայտնում է մեր աղբյուրը, հայկական թաղամասերի վրա այդ բախումները նույնպես ազդեցություն են ունեցել։

«Երբ բախումները թեժացան, Հալեպի Ազգային Առաջնորդարանը չեղարկեց հունվարի 9-ի՝ Մեռելոցի հիշատակի Պատարագը և հորդորեց հայ համանքի ներկայացուցիչներին դուրս չգալ բնակարաններից։ Նահանգապետարանը հունվարի 7-ը բոլոր վարժարաններում և հաստատություններում արձակուրդ հայտարարեց՝ բացառաությամբ հիվանդանոցների և ծառայողական կառույցների։ Հայաբնակ թաղամասերը նյութական որոշակի վնասներ են կրել։  Կեսգիշերին բախումները հանդարտվել են, առավոտյան որոշ կետերում կրկին կրակոցների ձայներ են լսվել։ Այժմ քաղաքում զգուշավոր հանդարտություն է տիրում»,- Yerkir.am-ին հայտնեցին «Գանձասար» պարբերականից։

Հիշեցնենք, որ «Գանձասար»-ը նախորդիվ նույնպես ներկայացրել էր իրավիճակը` հայտնելով նաև բախումների պատճառների և դերակատար ուժերի մասին որոշ մանրամասներ։