Ալավերդիում կրքերը հանդարտվել են, բայց` ժամանակավոր

Ոստիկանության Լոռու մարզային վարչության պետ Արամ Ղազարյանի հորդորով` երեկ երեկոյան` ժամը 20.00-ին, Ալավերդիում բողոքի ցույց նախաձեռնած քաղաքացիները որոշել են բացել Երևան-Թբիլիսի երկաթուղին:

Հիշեցնենք, որ երեկ առավոտյան մի քանի հարյուր ալավերդցիներ փակել  էին Երևան-Թբիլիսի երկաթուղին` պահանջելով լուծումներ առաջարկել արդեն մի քանի ամիս չգործող` Ալավերդու պղնձաձուլարանի համար:

Yerkir.am-ի աղբյուրները հայտնում են, որ ոստիկանության պետ Ղազարյանն ալավերդցիներին խոստացել է, որ ուրբաթ օրը` փետրվարի 15-ին, Ալավերդի կժամանեն ՎՏԲ բանկի ներկայացուցիչները, «Վալլեքս» խմբի ղեկավարները և փոխվարչապետ Տիգրան Ավինյանը:

«Եթե համաձայնություն չլինի, կշարունակենք ճանապարհների արգելափակումն ու բողոքի մեր ձայնը կրկին ու կրկին կբարձրացնենք»,- ասաց մեր զրուցակիցը:

Երեկ, երբ ցուցարարներն անսացել են ոստիկանապետի հորդորին, մեկ էլ պարզվել էր, որ ոստիկանության բաժանմունք են տարվել գործարանի երկու աշխատակից: Ընդ որում` նրանցից մեկը պղնձաձուլական արտադրամասի պետն է եղել: Բայց ցուցարարները պահանջել են նրանց ազատ արձակել և միայն նրանց գալուց հետո են հեռացել` պայմանով, որ եթե ուրբաթ որևէ լուծում չլինի, ճանապարհները կփակեն անժամկետ: